Charles d'Orléans
Quant Souvenir me ramentoit
La grant beauté dont estoit plaine,
Celle que mon cueur appelloit
Sa seule Dame souveraine,
De tous les biens la vraye fontaine,
Qui est morte nouvellement,
Je dy, en pleurant tendrement :
Ce monde n'est que chose vaine !
Ou vieil temps grant renom couroit
De Creseide, Yseud, Elaine
Et maintes autres qu'on nommoit
Parfaites en beauté haultaine.
Mais, au derrain, en son demaine
La Mort les prist piteusement ;
Par quoy puis veoir clerement
Ce monde n'est que chose vaine.
La Mort a voulu et vouldroit,
Bien le congnois, mettre sa paine
De destruire, s'elle pouvoit,
Liesse et Palaisance Mondaine,
Quant tant de belles dames maine
Hors du monde ; car vrayement
Sans elles, a mon jugement,
Ce monde n'est que chose vaine.
Amours, pour verité certaine,
Mort vous guerrie fellement ;
Se n'y trouvez amendement,
Ce monde n'est que chose vaine.
Retour au sommaire
Dame qui cuidiez trop savoir,
Mais vostre sens tourne en folie,
Et cuidiez les gens decevoir
Par vostre cautelle jolie.
Qui croiroit vostre chiere lie
Tantost seroit pris en voz las :
Encore ne m'avez vous mie,
Encore ne m'avez vous pas !
Vous cuidiez bien qu'apercevoir
Ne sache vostre moquerie ;
Si fais, pour vous dire le voir.
Et pour ce, chietement vous prie,
Alez jouer de l'escremrie
Autre part, car, quant en ce cas,
Encore ne m'avez vous mie,
Encore ne m'avez vous pas !
Vous ferez bien vostre devoir,
Se m'atrapés par tromperie ;
Car trop ay congneu, main et soir,
Les faulx tour dont estes garnie.
On vous appelle : foul s'y fie.
Deportez vous de telz esbas :
Encore ne m'avez vous mie,
Encore ne m'avez vous pas !
Retour au sommaire
Escollier de Merencolie,
A l'estude je suis venu,
Lettres de mondaine clergie
Espelant a tout ung festu,
Et moult fort m'y treuve esperdu.
Lire n'escripre ne sçay mye,
Dez verges de Soussy battu,
Es derrebiers jours de ma vie.
Pieça, en jennesse fleurie,
Quant de vif entendement fu,
J'eusse apris en heure et demye
Plus qu'a present ; tant ay vesqu
Que d'engin je me sens vaincu ;
On me deust bien, sans flaterie,
Chastier, despoillié tout nu,
Es derreniers jours de ma vie.
Que voulez vous que je vous die ?
Je suis pour ung asnyer tenu,
Banny de Bonne Compaignie,
Et de Nonchaloir retenu
Pour le servir. Il est conclu !
Qui vouldra, pour moy estudie :
Trop tart je m'y suis entendu,
Es derreniers jours de ma vie.
Se j'ay mon temps mal despendu,
Fait l'ay, par conseil de Follye ;
Je m'en sens et m'ens suis sentu,
Es derrniers jours de ma vie !
Retour au sommaire
Que me conseilliez vous, mon cueur ?
Iray je pars devers la belle,
Luy dire la peine mortelle
Que souffrez pour elle en doleur ?
Pour vostre bien et son honneur,
C'est droit que vostre conseil celle.
Que me conseillez vous, mon cueur,
Iray je pars devers la belle ?
Si plaine la sçay de doulceur
Que trouvery mercy en elle,
Tost en aurez bonne nouvelle.
G'y vois, n'est ce pour le meilleur ?
Que me conseilliez vous mon cueur ?
Retour au sommaire
Le voulez vous
Que vostre soye ?
Rendu m'octroye,
Pris ou recours.
Ung mot pour tous,
Bas qu'on ne l'oye :
Le voulez vous
Que vostre soye ?
Maugré jalous,
Foy vous rendroye ;
Or sa, ma joye,
Accordons nous :
Le voulez vous ?
Retour au sommaire
Dernière mise à jour : 31/10/97